كل ما تريد معرفتة عن الجسات 👌
- الجسات :- هي عبارة عن حفر أرضية في الموقع المراد استكشافه بأعماق مختلفة يمكن من خلالها الحصور على عينات التربة للتعرف على نوعية وترتيب الطبقات التحتية ( Soil Profile ) وقد يكون الحفر يدوي او باستخدام معدات آلية أخرى.
- ملحوظة :- استشاري التربة هو اللي بيقوم بالاختبارات اللازمة لعينات التربة ويعطينا تقرير )
تقرير التربة ( يمكن الاستفادة منه في معرفة :-
1 - نوع الأساس المقترح ( Type of Foundation ) -:
- قد يكون الأساس اما سطحي ( Shallow Foundation ) او عميق ( Deep Foundation .)
- الأساس السطحي ( Shallow Foundation ) :- بتكون عبارة عن قواعد او لبشة وبلجأ ليها لما بيكون منسوب التربة
الصالحة للتأسيس قريب من سطح الأرض الطبيعية لحد حوالي 5 م.
- الأساس العميق ( Deep Foundation ) :- بتكون عبارة عن خوايق وبلجأ ليها اذا كان منسوب التربة الصالحة
للتأسيس على بُعد كبير من منسوب سطح الأرض الطبيعية " أي ان ارتفاع الحفر كبير ".
2 - منسوب التأسيس ( Foundation Level) -:
- بيحددلي فيه مكان التربة اللي هتقدر تشيل احمال المبنى.
3 - اجهاد التربة ( Bearing Capacity ) -:
- بيحتاجه المهندس الانشائي لعمل تصميم القواعد او الاساسات عموما.ً
- منسوب المياه الجوفية ( Ground Water Table) -:
- ده بالنسبالي بيكون مهم جداااااا لأني لازم اعرف منسوب المياه الجوفية واقارنها بمنسوب التأسيس - ليه ؟ - علشان احدد التصرف المناسب لحل مشكلة المياه الجوفية إن وُجدت .
سؤال مهم / ايه اللي انا هستنتجه لما اقارن منسوب المياه الجوفية بمنسوب التأسيس ؟؟
- هطلع باحتمال من 3 احتمالات وكل احتمال منهم بيحددلي اذا كان في مشكلة ولا لأ واذا لقيت مشكلة اقدر اتصرف ازاي والـ 3 احتمالات دول هما :-
الإحتمال الأول ← الاقي ان منسوب التأسيس هو نفس منسوب المياه الجوفية " بمعنى انهم بيساووا بعض " وساعتها يبقى معنديش مشكلة - ليه ؟؟ - علشان هقدر اصب القاعدة العادية ب سُمك معين وفوقها القاعدة المسلحة وبالتالي المياه مش هتوصل للقاعدة المسلحة ولا للحديد بتاعها.
الإحتمال التاني ← الاقي ان منسوب التأسيس أعلى منسوب المياه الجوفية وساعتها يبقى معنديش مشكلة - ليه ؟؟ - لأني كدة انا هحفر وهعمل الاساسات بتاعتي ومش هتكون المياه ظهرتلي ولا هتيجي ناحية الاساسات بتاعتي.
الإحتمال التالت ← الاقي ان منسوب التأسيس تحت منسوب المياه الجوفية " أقل " وساعتها يبقى عندي مشكلة ، ازاي بقى ؟؟
- لو لقيت ان منسوب التأسيس تحت منسوب المياه الجوفية بمسافة اقل من او تساوي 30 سم مش هتكون عندي مشكلة
كبيرة ومش هحتاج اعمل نزح للمياه دي وهيكون عندي اكتر من تصرف ممكن اعمل أي واحد فيهم :-
← التصرف الأول :- هروح لدكتور الاساسات يعمل ليا منسوب التأسيس اعلى شوية بحيث يكون منسوب التأسيس هو نفس منسوب المياه وهتكون كدة المشكلة اتحلت - ازاي ؟؟ - ارجع للاحتمال الأول.
← التصرف التاني :- أصب في ال 30 سم دول خرسانة عادية واعتبرها كأنها فرشة نضافة ومياه الخلط بتاعتها هتبقى هي المياه الجوفية مع ملاحظة اني هعلي الخرسانة العادية 10 سم زيادة " بمعنى اني هصب خرسانة عادية ب سُمك 40 سم " -
ليه ؟؟ - علشان ميبقاش وش الخرسانة العادية " اللي قاعد عليه حديد القاعدة المسلحة " مع وش المياه بالظبط علشان احافظ على حديد القواعد المسلحة من الصدأ.
سؤال مهم / طيب لو لقيت بقى ان منسوب التأسيس تحت منسوب المياه الجوفية بمسافة اكبر من 30 سم اعمل ايه ؟؟
- ساعتها هضطر اعمل نزح للمياه اللي موجودة دي بعد ما اعمل ستاير خوازيق بنتونايت متقطاعة علشان احافظ على مياه الجار.
- النزح ( Dewatering ) :- هو شفط او سحب المياه من الأرض اللي وُجد بها منسوب التأسيس تحت منسوب المياه.
خلي بالك :- مشكلة النزح انه اذا تم بدون دراسة ودون عمل ستائر خوازيق البنتونايت انه هيسحب المياه الموجودة في تربة مبنى الجار وهيسحب معاها أجزاء من التربة فيحدث خلخلة في تربة الجار تحت الاساسات فينهار مبناه او يحدث به شروخ على اقل تقدير.
ملحوظة :- لو حصل خطأ في تقرير التربة مثلاً وجيت اعمل حفر ولقيت منسوب المياه الجوفية اعلى من منسوب الاساسات
ودكتور الجسات كان حصل عنده غلطة وكتب في التقرير ان منسوب الاساسات اعلى من منسوب المياه ، معنى كدة اني لماهحفر هتفاجئ بالمياه في وشي - هتصرف ازاي ؟؟ - لااااااااازم اردم في الحال بدون تفكير.
كيف تؤخذ الجسات ؟
- لو عندي الجسة طولها 30 م هاخد عينة لكل متر من الجسة في حالة ثبات نوع التربة في المتر الواحد " بمعنى ان كل
متر من العينة فيه نوع تربة واحد فقط " معنى كدة ان هيكون عندي ناتج الجسة 30 عينة تربة هيتم اختبارهم.
متر من العينة فيه نوع تربة واحد فقط " معنى كدة ان هيكون عندي ناتج الجسة 30 عينة تربة هيتم اختبارهم.
- سؤال مهم / طيب لو طلع عندي في متر واحد من ال 30 متر دول اكتر من نوع تربة ) نوعين مثلاً ( اعمل ايه ؟؟
- يبقى المتر ده هاخد منه عينتين " 2 عينة " وبدل ما هيكون من الجسة دي عندي 30 عينة هيبقوا 31 عينة وهكذا.
- علشان اخد الجسة بنستخدم ماكينة معينة بيكون ليها ماسورة طويلة مكونة من عدة مواسير متوصلة مع بعضها كل ماسورة منهم طولها ما بين 3م و 4م وقطرها حوالي 2 بوصة " 5 سم تقريبا " وبيكون في المقدمة ماسورة تانية طولها 1م وقطرها 4 بوصة " 10 سم تقريبا " الماسورة دي اسمها المأخذ وهي دي اللي بطلع منها العينة.
- سؤال مهم / ايه السبب اني باخد عينة واحدة من كل متر من التربة ؟؟
- السبب ان المأخذ بتاع الماكينة دي بيبقى طوله 1 م زي ما قولنا فلما بطلع العينة بيبقى طولها 1 متر وزي ما قولنا لو لقيتا التربة اللي طلعتها من المأخذ دي نوع واحد هاخد عينة واحدة لو لقيتها نوعين هاخد عينتين.
ملحوظة :- يوجد نوعين من العينات :-
1 - عينة غير مقلقلة :- وهي العينة اللي انا بطلعها من التربة المتماسكة " Cohesive Soil " زي الطين.
2- عينة مقلقلة :- وهي العينة اللي انا بطلعها من التربة الغير متماسكة " Non-Cohesive Soil " زي الرمل.
طريقة حفظ العينات :-
- بعد ما اخد العينات بحطها في أكياس بلاستيك او صناديق خشبية او علبة صفيح وبحط معاها ورقة مكتوب عليها رقم
الجسة ورقم المتر ورقم العينة ثم يتم ارسالها للمعمل.
الجسة ورقم المتر ورقم العينة ثم يتم ارسالها للمعمل.
- الأفضل وضع العينات في صناديق خشبية - ليه ؟؟ - لان الخشب عازل للحرارة وهيساعدني اني احافظ على المحتوى
المائي للعينة قبل ما توصل للمعمل ولو مش متوفر عندي في الموقع صناديق خشبية هحط العينات في أكياس او علب صفيح لكن اخزنها في مكان بعيد عن حرارة الشمس قدر الإمكان.
تحديد عدد الجسات :-
- تؤخذ الجسات بواقع جسة لكل 300 متر مسطح على ان لا يقل عدد الجسات عن جستين ولو زودت عن كدة هيكون افضل لان أسعارها مش غالية وهكون في امان اكتر.
ملحوظة :- يتم حساب عدد الجسات على حسب مساحة المباني ، بمعنى لو عندي ارض مساحتها 2000 متر مسطح وهعمل عليها ڤيلا مساحتها 300 متر مربع هيكون عندي جستين فقط.
كيفية حساب عمق الجسة :-
- يتم الحفر في التربة حتى يتم الوصول لاحدي الصور الثلاثة الأساسية للتربة ( رمل ، حجر جيري ، صخر).
- بعد كدة لو لقيت اني وصلت للرمل هنزل تحته 10 م بشرط ميقطعوش عرق من تربة اضعف من الرمل " طين مثلاً " ولو قطعه عرق من تربة اضعف منه هبتدي احسب ال 10 متر من اسفل العرق ده.
سؤال مهم / طيب لو لقيت وانا بحفر حجر جيري او صخر هعمل ايه ؟؟
- لو لقيت حجر جيري هنزل تحته 6 م بشرط انه ميقطعوش عرق اضعف منه ولو قطعه عرق اضعف منه هبتدي احسب ال 6 م تاني من اسفل العرق ده.
- لو لقيت صخر هنزل تحته من 1.5 م ل 3 م " على حسب جودة الصخر " بشرط انه ميقطعوش عرق اضعف منه ولو قطعه عرق اضعف منه هبتدي احسب المسافة من اسفل العرق ده.
ملحوظة :- هلاقي ان الماسورة بتاعت ماكينة الجسات مخترقة الأرض حواليها سائل لونه رمادي شبه الاسمنت جاي لها من حفرة بعيدة عنها شوية وبينهم قناية صغيرة كدة.
- سؤال مهم / ايه السائل ده وايه لازمته ؟؟
- السائل ده هو البنتونايت ولازمته انه بيقعد ينزل في الحفرة اثناء عمل الجسة للحفاظ على قوام الحفرة من الانهيار لما
اسحب الماسورة علشان اخد العينة وارجع ادخلها تاني في الحفرة علشان اخد العينة اللي بعد كدة.
- ملحوظة :- لو انا مهندس مقاول لازم اخد بالي وانا بحفر ان طبقات الحفر اللي بتظهرلي ماشية بنفس الترتيب والعمق اللي جاي من تقرير الجسة ودي احد طرق مراجعة تقرير الجسة والتأكد منه.
- ملحوظة :- لو جايلي في تقرير الجسة ان منسوب المياه عالي معنى كدة اني هحتاج اعمل ستارة خوازيق بنتونايت عشان اسند الجار واقدر اسحب المياه هخلي اللي بيحفر اول خازوق ساند يعرفلي المياه على منسوب كام.
- سؤال مهم / ازاي هعرف المياه على منسوب كام ؟؟
- هجيب ازازة بلاستيك واحط فيها تقل واربطها بحبل واغطتسها في حفرة اول خازوق وبعد كدة اطلع الازازة واحسب الطول اللي نزل من الحبل قد ايه وطول الجزء المبلول بالمياه قد ايه علشان اتأكد ان منسوب المياه اللي جاي في تقرير الجسة صحيح.
- محلوظة :- ارتفاع أي مبنى له علاقة بعرض الشارع " ارتفاع المبنى بيساوي 1.5 مرة عرض الشارع " عرض الشارع يتم قياسه من المبنى للمبنى وليس عرض الاسفلت فقط.
- ممكن عرض الشارع مش هو اللي يكون حاكم ارتفاع المبنى ويكون الموضوع مقيد بالاشتراطات البنائية او بالطيران
المدني مثلاً او أي شيء آخر.
- سؤال مهم / لو انا في منطقة نائية او قرية مثلاً ومش عارف اعمل جسة هعمل ايه ؟؟
- هروح اشوف اقرب مدرسة للأرض اللي عايز ابني عليها واحاول احصل على الجسة بتاعتها او اشوف مبنى مثالي قائم بالفعل وله مدة تحت التشغيل والاستخدام بدون حدوث مشاكل واعمل زيه في تصميم القواعد او الساسات عموما ويُفضل اني مزودش عن عدد الأدوار بتاعته للأمان.
- نأكد تااااااني :- لازم قبل ما اعمل أي حفر او ابدأ اعمل أي حاجة اتأكد ان منسوب المياه الجوفية على الطبيعة هو نفس
المنسوب للي جاي من تقرير الجسة علشان لو المكتب كان حصل من عنده غلطة في التقرير مروحش في داهية.
- ملحوظة :- وانا بعمل الحفر وعندي جيران هكون قصاد حاجة من اتنين :-
1 - إما أكون لسة في حضن الجار " بمعنى ان منسوب تأسيسي اعلى من منسوب تأسيس اساسات الجار ".
2 - أكون مش في حضن الجار " بمعنى ان منسوب تأسيسي تحت منسوب تأسيس اساسات الجار ".
← في الحالة التانية دي عندي مشكلة لأني هنزل تحت منسوب تأسيس الجار فالتربة اللي تحت الاساسات عنده هتهيل والمبنى هيشرخ او هينهار " الكلام ده سواء عندي مياه او معنديش ".
- سؤال مهم / كل الكلام اللي فات ده معناه ان ضروري أكون عارف مناسيب التأسيس بتاعت الجيران اللي حواليا طيب هعرفها منين ؟؟ .
- من تقرير سند جوانب الجار وده بيبقى عبارة عن File صغير لوحده كدة وبيكون ملحق بتقرير الجسة ، طيب لو معنديش ال File ده او حتى لو عندي لازم اخلي نفسي في الأمان ، سؤال مهم / طيب ازاي ابقى مأمن نفسي ؟؟
- لو عمارة الجار فيها بدروم هنزل البدروم واشوف أرضية البدروم منسوبها قد ايه ومنسوب التأسيس اكيد تحتها بمسافة معينة " هي متغيرة ومش ثابتة ولكن مع الخبرة هنعرفها ".
سؤال مهم / طيب لو الجار جنبي معندوش بدروم هعمل ايه علشان اعرف منسوب التأسيس بتاعه ؟؟
- هحفر خندق صغير عرضه نص متر في الأرض بتاعتي من ناحية الجار ده وافضل انزل لحد ما اعرف منسوب التأسيس بتاعه على كام ، ولكن موضوع الخندق ده بيحتاج صنايعي شاطر والمهندس يكون واقف على ايده وهو شغال علشان ميحصلش مشاكل.
ملحوظات عامة :-
- في المدن الجديدة يشترط عمل سقف البدروم اعلى من الشارع ب 1.20 م عشان الناس متعملش الأرضي محلات فالناس عملوا كدة فعلاً بس البدروم متعملش جراچ وعملوا البدروم مع الأرضي زي نظام الڤيلا " دوبلكس ".
- البدروم إما ان يكون كله تحت الأرض وإما ان يكون جزء منه فقط تحت الأرض والجزء الآخر فوق الأرض.
- المنور مبيفضلش مكمل لحد ما يوصل للبدروم " بيقف فوق سقف البدروم " ولو عندي البدروم تحت الأرض وعايز اهويه هعمله تهوية صناعية " شفاطات مثلا ".
- سؤال مهم / لو عندي اكتر من جار ومناسيب التأسيس بتاعتهم مختلفة هعمل ايه ؟؟
- عندي حلين :-
الحل الأول :- هشوف صاحب اعلى منسوب تأسيس وهيكون ده اخطر واحد بالنسبة ليا واحترمه وامشّي كل الشغل على كدة.
الحل التاني :- هشوف كل جار منسوب التأسيس بتاعه فين واتعامل معاه لوحده " ده الحل الاقتصادي والاوفر بالنسبالي ".
- سؤال مهم / لو انا بحفر وعندي احد واجهات المبنى على شارع مثلاً هل محتاج اعمل سند جوانب الحفر من ناحية الشارع ؟؟
- طبعا هسند من ناحية الشارع لأن الشارع عليه احمال العربيات ولو سيبتها كدة التربة هتهيل والشارع هيبوظ كمان.
- ممكن مسندش لو بحفر في صخر.
سؤال مهم / لو لقيت اني علشان أوصل لمنسوب التأسيس بتاعي محتاج اخرج عن حضن الجار 10 سم ولا 20 سم ولا 30 سم حتى ، هل هعمل ستارة خوازيق ساندة وأكلف نفسي مبالغ ضخمة علشان الكام سم دول ؟؟
- طبعا مش منطقي اني اعمل ستاير خوازيق بسبب اني لقيتني هنزل بعد حضن الجار 30 سم مثلاً !! ، مش هحفر ال 30 سم دول وهكلم دكتور الاساسات يغيرلي منسوب التأسيس ويعليه شوية لحد ما ابقى يدوبك في حضن الجار.
- كل الكلام اللي فات ده كان على أساس اني معنديش مياه جوفية لكن لما بيكون عندي مياه جوفية بكون قصاد حاجتين
ملهمش تالت :-
اول حاجة :- يكون ارتفاع المياه الجوفية صغير " حوالي 30 سم او اقل " وقولنا قبل كدة هنتصرف ازاي.
تاني حاجة :- لو المياه ارتفاعها كبير " هنا كدة عندي مشكلة " وهضطر اعمل ستاير خوازيق متقاطعة علشان امنع مياه
الجار انها تيجي عندي وبعد كدة اشفط المياه اللي جوة الأرض بتاعتي.
- لو الاستشاري بتاع التربة اقترح عمل خوازيق يبقى لازم الاقي في التقرير معلومات عن الخازوق زي :-
1 - قطر الخازوق. 2 - طول الخازوق " محسوب من صفر الجسة ". 3 - تسليح الخازوق.
4 - حمل الخازوق التشغيلي " WorkingP ." 5 - حمل الاختبار " Working1.5 x P ."
6 - المسافات بين الخوازيق. 7 - منسوب الصفر " صفر الجسة ".
صفر الجسة :- أي رقم " منسوب " بيقوله دكتور الاساسات في التقرير بتاعه بيكون متنسب لصفر الجسة وهو مختلف عن الصفر المعماري وغالبا بيكون عند سطح المكان اللي انا خدت منه اول جسة وبعرف مكان اول جسة ده من الكروكي بتاع الأرض اللي ملحق مع تقرير الجسة.
الصفر المعماري :- هو منسوب الرصيف الموجود فوق الاسفلت.
- لازم اربط صفر الجسة بالصفر المعماري علشان شغلي كله بعد كدة هيكون من الصفر المعماري.
سؤال مهم / عرفنا ان الصفر المعماري بيكون من وش الرصيف ، طيب لو معنديش رصيف هعرف الصفر المعماري منين؟؟
- هشوف منسوب الاسفلت وازود عليه 20 سم وكدة يبقى معايا الصفر المعماري.
- ببص ع الموقع واشوف بعيني منسوب الأرض ومنسوب الرصيف واخد بالي هل في عندي فرق بينهم ولا لأ " Drop "وبعدها ببص على تقرير الجسة واشوف طالب مني احفر قد ايه علشان أوصل لمنسوب التأسيس واشوف اللوح المعمارية والانشائية واشوف الانشائي قايلي احفر قد ايه واشوف هل في غلط في الموضوع ولا لأ ، ازاي ؟؟
-مثال للتوضيح :- لو انا مثلاً بصيت ولقيت ان الرصيف اعلى من الأرض بحوالي 40 سم وروحت بصيت على التقرير لقيته بيقولي احفر 4 م علشان توصل لمنسوب التأسيس وروحت بصيت على الانشائي لقيته برضو بيقولي احفر 4م يبقى كدة اعرفان الانشائي غلطان لانه كان لازم يقولي احفر 4.40 م علشان ال Drop .
-معلومة عن الصفر المعماري :- عندي نوعين من الصفر المعماري وهما :-
1 - صفر معماري اوحد ← لو ببني عمارة واحدة او ڤيلا مثلاً.
2 - صفر معماري متغير ← لو ببني كومباوند احيانا بيكون عندي كل عمارة لها رصيف وكل رصيف له منسوب معين
مختلف عن منسوب الرصيف اللي جنبه فبيكون في الحالة دي متحددلي روبير في الموقع وموجود عندي في اللوح كل رصيف منسوبه كام بالنسبة للروبير ده.
- في حالة الصفر االمعماري الأوحد " الشغل العادي " :-
- هدور على الرصيف بتاع الشارع وهلاقي العمارات كلها واخدة الصفر من الرصيف ده ولو مش عندي رصيف هشوف الاسفلت واطلع عنه 20 سم وبعد ما احصل على الصفر هنقله لنقطة قريبة وفي مكان سهل بالنسبالي اقدر اقيس منه أي حاجة.
- سؤال مهم / لو انا في منطقة معنديش فيها رصيف ولا اسفلت اعمل ايه ؟؟
- هستغل غرفة التفتيش وهعرف منها منسوب الاسفلت - ازاي ؟ - غطاء غرفة التفتيش هو منسوب الاسفلت وازود عليه
20 سم يبقى انا كدة معايا الصفر المعماري.
سؤال مهم تاني / طيب لو معنديش لا رصيف ولا اسفلت ولا حتى غرفة تفتيش هعرف ازاي الصفر المعماري ؟؟
- ساعتها لازم اطلب مساح من جهة إدارية بييجي يحددلي مكان الصفر المعماري.
ملحوظة عامة :- لو عندي مبنى قائم وعايز اهدمه وابني مكانه لازم اكسر الاساسات بتاعته كمان حتى لو كان منسوب
التأسيس الجديد عند وش الاساسات اللي موجودة قبل كدة لاني وقت ما هاجي انفذ القواعد الجديدة سواء لبشة او قواعد منفصلة هلاقي حاجات مرتكزة على التربة وحاجات مرتكزة على خرسانة وده مرفوض لعدم حدوث هبوط تفاضلي.
سؤال مهم / امتى ممكن اسيب الاساسات القديمة " في حالة ان منسوب سطحها هو نفس منسوب التأسيس الجديد " ؟؟
1 - لما يكون كل قاعدة جديدة هتتنفذ هتكون مرتكزة على قاعدة قديمة " وده مستحيييييييييييييييييييل يحصل ".
2 - لو الاساسات القديمة كانت لبشة.
سؤال مهم / ازاي انقل المناسيب باستخدام ميزان القامة ؟؟
- هحط ميزان القامة في مكان اقدر اشوف منه النقطتين اللي عايز انقل المنسوب من واحدة فيهم للتانية بدون ما يكون في
عوائق بينهم وبعد كدة هجيب القامة احطها عند المنسوب اللي عايز انقل منه وليكن مثلاً منسوب الشارع واخد قراية القامة عند النقطة دي ولتكن مثلاً 1.30 م ، بعد كدة هبقى عايز انقل المنسوب على حيطة او عمود قريبين من الموقع بتاعي جداً هخلي العامل ينقل القامة يحطها على الحيطة او العمود اللي عايز احط المنسوب عندهم ، طبيعي هلاقي القراية مختلفة عن ال 1.30 م اللي كنت قريتهم عند النقطة الأولى فهخلي العامل يطّلع او ينزّل القامة لحد ما اقرا منسوب 1.30 م واروح اعلم عند كعب القامة " كدة انا نقلت منسوب الشارع للموقع عندي " واورح طالع فوق المنسوب ده ب 20 سم كدة انا قدرت احصل على الصفر المعماري في مكان قريب عندي في الموقع اقدر انسب منه أي حاجة بسهولة.
طبقات الاحلال " الأساس المساعد " :-
- قد تكون طبقات الاحلال من تربة رملية حرشة وقد تكون خليط من الرمل والسن ويلاحظ انه لا يفضل استخدام سن بمفرده - ليه ؟ - نظراً لوجود فراغات بين حبيبات السن تسمح لحدوث انضغاط مما يتسبب في حدوث هبوط للمبنى مع الزمن اما الرمل فيمكن استخدامه بمفرده دون القلق من حدوث مشاكل.
- ملحوظة :- لو باخد جسات في ارض مساحتها صغيرة ومثلاً اخدت جستين وطلعوا مختلفين في شكل ال Profile بتاع التربة هعمل حاجة من اتنين يا اما هاخد جسة تالتة تأكيدية او هشوف الجسة الأسوأ من الجستين اللي انا اخدتهم واشغل عليها علشان ابقى في امان.
- للتحميل كتاب التنفيذ م حسن قنديل أحدث نسخة : حمل من هنا
- كل ما يخص التنفيذ : إنتقل من هنا
الشكر موصول للمهندس /محمود حسن القباني. و المهندس / محمد هشام أبوبكرفهما من قاما بعمل الملخص أعلاه.
__________________________________________________________________________
تابعنا على اليوتيوب : إنتقل تابعنا على الفيس بوك : إنتقل حمل تطبيق مدنى بوك من جوجل بلاى : حمل من هنا تابعنا على تليجرام : إنضم من هنا
تعليقات
إرسال تعليق