كل ما تريد معرفتة عن الخوازيق
معلومات عن الخوازيق :-
- الخوازيق من حيث طريقة نقل الاحمال للتربة نوعان :-
1 - خوازيق احتكاك " Friction Piles " :- وهذا النوع يستخدم بندرة مثلاً في حالة هعمل اساسات سور او اساسات بوابة مصنع او لو عندي التربة رديئة وهذا النوع من الخوازيق مرتبط بالتربة الموجودة حوله ويحدث بينه وبينها احتكاك Friction .
2 - خوازيق الارتكاز " End Bearing Piles " :- ويتحمل هذا النوع احمال كبيرة ومرتبط بالتربة اللي بيرتكز عليها.
- بعمل الخوازيق لسبب من اتنين :-
1 - خازوق لسند الجيران " خازوق ساند ".
2 - خازوق لحمل احمال المبنى " خازوق عامل ".
- الخازوق الساند :-
- بدايته من على وش الأرض ويكون ارتفاعه مرتبط اساسا بعمق الحفر وقد يصل ارتفاعه الى 12 م وكما ذُكر سابقا نعلم ان هذا النوع من الخوازيق له علاقة بالجيران فقط وهو غالبا وإن لم يكن دائما ما يكون خازوق احتكاك بمعنى انه لا يرتكز على تربة تحته وله وظيفة واحدة فقط وهي سند جوانب الجار ولا يتحمل احمال المبنى الا في حالات نادرة وقليلة جداً سنتعرض لها لاحقا.ً
- طول الخازوق الساند يعتمد على :-
1 - ارتفاع الحفر.
2 - الجزء المدفون من الخازوق في التربة.
- طول الخازوق الساند = ارتفاع الحفر + ارتفاع الجزء المدفون من الخازوق.
ملحوظة :- ارتفاع الحفر هيكون معلوم وبناخد ارتفاع الجزء المدفون يساوي من ) 1.5 ل 2 ) x ارتفاع الحفر.
مثال :- لو عندي ارتفاع الحفر 4م هيكون ارتفاع الجزء المدفون من الخازوق من 6م ل 8م يعني الارتفاع الكلي للخازوق من 10 م ل 12 م.
- ملحوظة :- في الغالب يعتمد طول الجزء المدفون من الخازوق على نوع التربة حول الجزء المدفون " نوع التربة اللي هيتدفن فيها ".
- ملحوظة :- يجب دراسة عمق الحفر بعناية حيث انه اذا زاد عن قيم معنية قد نلجأ لزيادة قطر الخازوق " الساند " او استخدام ضواغط او كلاهما حتى لا تحدث مشاكل.
- الخازوق العامل :-
- ينتهي مع بداية الأساس ويمتد طوله بحيث يصل لتربة يرتكز عليها.
- لذلك لا يصح استخدام الخازوق العامل كخازوق ساند او العكس الا في حالات قليلة هنعرفها بعدين.
- كروكي يوضح لماذا لا يتم استخدام الخازوق الساند كخازوق عامل او العكس.
تصنيف الخوازيق " من حيث طريقة التنفيذ " :-
1 - خوازيق يدوي " ستراوس " :-
- بستخدم ماكينة الستراوس لعمل الخوازيق بالطريقة اليدوية وشكلها بيكون عبارة عن 3 ارجل يخرج ويتدلي منهم Wire وال Wire ده بيخرج منه ذراع وفي مقدمة الذراع توجد جلبة قطرها اقل من قطر الخازوق بحاجة بسيطة - ليه ؟ - هنشرحها بعدين بالتفصيل.
- الماكينة دي بدائية جد اً ومعدلات انتاجها حوالي خازوق واحد فقط في اليوم واحيانا بتعمل خازوقين في 3 أيام بمعدل 2 / 3 خازوق / اليوم.
- اقصى طول للخازوق الممكن تنفيذه بهذه الماكينة هو 15 م.
- يُفضل اني مستخدمش الخوازيق الستراوس على قد ما اقدر - ليه ؟ - لان معدل الإنتاجية ضعيف والجودة في منتهى الردائة وبه سرقة ولكن احيانا بكون مضطر الجأ لعمل الخوازيق الستراوس - امتى ؟ - لما بيكون عندي الأرض بتاعتي صغيرة " فيها واجهة طولها اقل من او يساوي 10 م " او ممكن تكون الأرض كبيرة لكن الشوارع اللي بتبص عليها الأرض صغيرة مقدرش ادخل فيها ماكينة زي ال C.F.A لان ماكينة ال C.F.A بتكون طويلة وبتحتاج ان يكون اتساع الشارع كافيا للحركة والمناورة وهنا مش بيكون عندي حل غير اني الجأ للخوازيق الستراوس مضطراً.
- خوازيق النص ميكانيكي :-
- ماكينة تشبه ماكينة الستراوس الى حد كبير جد اً لكن بها موتور متصل ب Wire وال Wire ده متصل باسطوانة " بلف " وزنها كبير جداً بسيبها تحت تأثير وزنها كذا مرة تنزل وتطلع بحيث تحفر في التربة ولها باب بيتفتح وهي نازلة في التربة وبيتقفل وهي خارجة من الحفرة بحيث يمنع سقوط التربة اللي تم حفرها في الحفرة مرة ثانية.
- النوع ده يُعتبر يدوي برضو وبيديني خوازيق بنفس ردائة الخوازيق اليدوية والموتور اللي موجود ده فايدته انه بيقلل عدد العمالة يعني بيوفر للمقاول مش مفيد بالنسبالي في أي حاجة.
- اكبر طول للخازوق اقدر أوصله بالماكينة النص ميكانيكي هو 18 م ولو المقاول قالي ان الخازوق طوله هيكون اكبر من كدة يبقى ناوي يضحك عليا.
- اقصى قطر اقدر انفذه في الطريقة اليدوية والنص مكيانكي هو 50 سم مش اكتر من كدة.
3 - خوازيق ال C.F.A " Continuous Flight Auger -: "
- تُسمى بخوازيق بالحفر والتفريغ او الحفر البريمي.
- بتحفر خوازيق طولها بيوصل ل 40 م على اقصى تقدير.
- في المباني السكنية او حتى الأبراج لا يتعدى في الغالب طول قطر الخازوق عن 60 سم واقصى قطر للخازوق يمكن حفره وتنفيذه بماكينة ال C.F.A هو 60 سم.
- ال C.F.A بتحفر وهي نازلة وتصب وهي طالعة - ازاي ؟ - لان عندي في مركز البريمة بتاعتها ماسورة صب خرسانة متوصلة بمضخة " Pump " معنى الكلام ده ان معدل الإنتاجية مرتفع وفعلاً بيوصل عدد الخوازيق اللي ممكن اعملها بال C.F.A الى 25 خازوق في اليوم الواحد لو الماكينة حالتها كانت كويسة ولكن عندي عيب خطير ، ايه هو ؟؟
- العيب هو ان ممكن البريمة وهي بتحفر وتصب في نفس الوقت الاقي ان البريمة بتوقع طين في وسط الخازوق او يحصل تعشيش وكل ده انا مش شايفه.
- ماكينة ال Bored Piles :-
- تُسمى ماكينة الحفر الدوار.
- قطرها اكبر من 60 سم.
- نفس شكل ماكينة ال C.F.A ولكن مفيهاش بريمة - امال فيها ايه ؟ - فيها ماسورة طويلة ملساء وتنتهي ببوكيت "
Bucket " والماكينة دي بتحفر وتطلع التراب فقط وهنا عندي ميزة وهي اني هحفر واطلع التراب وبعد كدة هجيب Pump علشان اصب الخرسانة لوحدها فمعنى كدة ان مفيش فرصة ان تراب او طينة تقع في نص الخازوق زي ما ممكن يحصل في ال C.F.A ، يعني الخلاصة انها بتديني فرصة احفر واستلم والحفر اشوف لو فيه مشكلة واستلمه كويس وبعد كدة اصب الخرسانة.
ملاحظات :-
- في ماكينة ال C.F.A يتم الاعتماد على جسم البريمة في سند جوانب الحفرة ولذلك وانا بصب ال Pile برفع البريمة ببطئ علشان الجاونب متنهارش.
- سعرها الحالي " بتاريخ شهر 7 لسنة 2018 " بيتراوح ما بين 70 ل 100 جنيه لكل متر.
- في ماكينة ال Bored Pile الماكينة بتحفر وتطلع وكدة ممكن الحفرة تنهار لذلك نجد ان لها مواصفة خاصة وبنعمل مواسير ساندة تحافظ على جوانب الحفرة من الانهيار وتمتد هذه المواسير لحد مثلاً 12 م وباقي طول الخازوق بيتملي بالبنتونايت علشان اسند جوانب الحفرة.
سؤال مهم / هل البنتونايت ده بستخدمه مرة واحدة وبعد كدة برميه ولا بقدر اشغله معايا تاني ؟
- بقدر افلتره وانضفه وارجعه لحالته الأولى واستخدمه في عمل سند جوانب الحفرة التالية وبعد كدة افلتره تاني واستخدمه في الحفرة اللي بعدها وهكذا.
- البنتونايت ارخص من المواسير اللي بستخدمها في السند لان المواسير بتحتاج اوناش ومعدات وعمالة.
سؤال مهم جداً / ليه معملش سند جوانب الحفرة كله بالبنتونايت من اوله لآخره ومستخدمش مواسير خالص وابقى وفرت ؟
- لأن الأجزاء الأولى من التربة بتكون ضعيفة مينفعش معاها بنتونايت يسندها ولازم استخدم مواسير ساندة للتربة دي أما
التربة تحت بتكون قوية فالبنتونايت ينفع معاها.
- استشاري التربة بيعرفني طول مواسير السند قد ايه وغالبا مش هنحتاج نمد المواسير لاكتر من 12 م.
سؤال مهم / لما هاجي اصب الخرسانة بيكون عندي بنتونايت في قاع الحفرة ف هصب ازاي ؟
- هنزل ماسورة لحد تحت علشان اقدر اصب منها الخرسانة بدون ما تختلط بالبنتونايت - ازاي برضو ؟ - هنعرف ازاي
بالتفصيل بعدين.
5 - ماكينة ال Diaphragm Wall -:
- بتعمل ستائر لوحية ساندة عرضها كبير يصل عرض اللوحة الى 2.75 م وسُمكها يصل الى 80 سم او اكتر وطولها كبير على حسب الحاجة.
- شركة واحدة في مصر لديها هذه الماكينة وبالحجز واسعارها غالية وآخر سعر من سنتين " سنة 2016 " كان سعر اللوحة اللي طولها 30 م وعرضها 2.75 وسُمكها 60 سم حوالي 250.000 جنيه.
ملاحظات :-
- هييجي في دماغنا سؤال مهم دلوقتي وهو اعمل انهي خوازيق الأول الساندة ولا العاملة وهستفيد ايه من الترتيب ؟
- هنفذ الخوازيق الساندة الأول قبل العاملة توفيراً للوقت - ليه ؟؟ - لأن الكود بينص على ان الحفر لا يتم قبل 28 يوم من
صب اخر خازوق ساند فلو عملت العامل وبعده الساند هضطر اقعد 28 يوم متعطل والشغل واقف لحد ما اخر خازوق ساند يوصل للقوة المطلوبة " يوصل للشك النهائي ".
- لازم قبل ما اخرج من مكتب استشاري الجسات بعد ما استلم التقرير لو طالب اني اعمل خوازيق C.F.A اخد بالي لو الموقع بتاعي مساحته صغيرة علشان اطلب منه يغيرلي ال C.F.A الى ستراوس.
- سؤال مهم / ليه خازوق الستراوس مش كويس وحتى استشاري التربة مش بيحبه على الرغم انه ممكن يكون موصي بيه في التقرير ؟
- لان الخازوق الستراوس بنخاف من مشاكل التنفيذ الردئ والعمالة والسرقة فبنلاقي ان الاستشاري بيقلل حمله التشغيلي
علشان ياخد سوء التنفيذ في الاعتبار فبنلاقي ان خازوق ستراوس حمله 30 طن ونفس الخازوق C.F.A حمله 100 طن
ومعنى كدة ان ممكن تحت نفس القاعدة عدد الخوازيق الستراوس يكون اكبر من عدد الخوازيق لو هعملهم C.F.A .
الخوازيق الاستراوس " طريقة التنفيذ والاستلام " :-
- اول حاجة العمال بيجيبولي المعدات قبل ما هيشتغلوا بيوم واحد هقف معاهم اليوم ده هعملهم تأكيس الخازوق من الخنزيرة واحط سيخ حديد في الأرض مكان مركز الخازوق وافضل واقف معاهم لحد ما عمل تسامد للجلبة " بمعنى ان مركز الجلبة اللي هتحفر يكون فوق السيخ بالظبط ".
سؤال مهم / ازاي هعمل تسامد ؟
- هروح للحداد اخليه يعملي حديدة قطرها هو قطر الخازوق ولها مركز يدخل فيه السيخ اللي حددت بيه مركز الخازوق واظبط التسامد على الأساس ده بعد كدة هرفع الجلبة بحيث تبقى حرة الحركة فوق الطوق اللي ركبته في السيخ وابص بعيني لو لقيتها مظبوطة مع حدود الحفرة الصغيرة اللي عملتها بالطوق الحديدي اللي جبته من الحداد يبقى كدة تمام وكدة يقدروا ييجوا يبدأوا حفر عادي لان ضمنت ان التسامد مظبوط ، لكن لو لقيت ان الجلبة متحرفة عن الطوق الحديد اللي عملته يبقى التسامد عايز يتظبط فهحرك رجول الماكينة " في الوقت اللي الجلبة فيه حرة الحركة " لحد ما الاقي ان
الجلبة بقت فوق الحفرة تماما يبقى كدة كل حاجة تمام ، كدة انا خلصت التأكيس والتسامد.
- عندي طريقة تانية لظبط التسامد بدل الطوق الحديد ، هجيب دوبارة مربوط فيها مسمار من طرف والطرف التاني هربطه في السيخ ويكون طول الدوبارة هو نفس طول نصف قطر الخازوق وارسم حدود الحفرة بالدوبارة والمسمار واظبط التسامد بالجلبة وبعد كدة احفر.
ملاحظات :-
- في نهاية اليوم بكون خلصت مثلاً الخازوق اللي بدأت فيه مع بداية اليوم قبل ما العمال يمشوا في اليوم ده لاااااازم أأكسلهم واظبطلهم تسامد الخازوق اللي هيحفروه ويصبوه تاني يوم علشان ميخلونيش اضطر اجي بدري.
- اثناء الحفر ممكن يكون وش الأرض صلب شوية وناشف فممكن الاقي حد من العمال بيصب مياه جوة الحفرة عشان يسهل الحفر ، معنديش مشكلة والكلام ده صح عادي جداً.
- بعد التأكيس والتسامد عايز احفر فهحفر مثلأً اول 1.5 م ولا 2م واحط الماسورة الساندة وانزّل الجلبة من خلالها واحفر
تاني والماسورة تنزل شوية كمان واركب الماسورة اللي بعدها فيها واحفر وانزل الماسورة الساندة اللي بعدها وهكذا وكدة انا حفرت وسندت جوانب الحفر.
- الماسورة الساندة بيكون ارتفاعها مثلاً 3 م يُفضل وانا بنزلها وهحفر من خلالها ميكونش ظاهر منها غير1م لا اكتر- ليه
؟ - علشان الاقي سهولة في الحفر والماسورة نفسها متكونش عائق بالنسبة ليا وانا بحفر.
- تخانة الماسورة بيكون حوالي 8 مم.
- قطر الماسورة الخارجي بيكون هو نفس قطر الخازوق " بمعنى ان القطر بيتقاس من برة " وقطر الجلبة بيكون اقل من قطر الخازوق ب 3 او 4 سم عشان اقدر انزل الجلبة من خلال الماسورة الساندة ودون حدوث احتكاك.
فنيات اثناء ادخال الماسورة في الحفرة :-
- بمسك الماسورة بالحبل Wire إما أن يكون الحبل مشنقة ومتوصل بالماسورة مباشرة او بركب زور20 سم ولا 30 سم له فتحتين اقدر امسك منه الماسورة علشان متسقطش مني مرة واحدة وعشان اقدر اشيلها برضو والزور بيركب في الماسورة قلاوظ وبكون حاطط دُكمتين خشب " مسّاكتين " مرتكزين على الأرض وماسكين ع الماسورة عشان مستقطش مني داخل الحفرة.
- لازم في البداية خالص أكون قايس اطوال مواسير واتأكد ان مجموعهم مع بعض هيحققلي طول الخازوق اللي انا اعايزه ولااااااااااااااااااااااااااازم اتأكد ان المواسير كلها دخلت جوة الحفرة.
- العامل دايما مش هيبقى عايز ينزل كل المواسير وعايز يسرقني علشان يريح نفسه فلازم إما أكون واقف على ايده وهو بينزل المواسير كلها يا إما لو هاجي متأخر الموقع في اليوم ده او مش هقف طول اليوم معاه على ايده وهو شغال بكون عارف عدد المواسير فبلف الموقع كله واتأكد انه منزلهم كلهم مش مخبي منهم حاجة ولو اكتشفت انه عمل كدة لازم اعاقبه ماديا واعطلهم عن الشغل ع الأقل يوم.
- كدة انا عملت التأكيس والتسامد والحفر والسند بالمواسير فاضل استلام عمق الخازوق وصب الخرسانة.
- مينفعش اعتمد على عدد المواسير في استلام عمق الخازوق ولكن لازم استلمه رسمي بالشريط الكتان ، الشريط ده بيكون فيه حلقة نحاس بعلق فيها " تُقل " علشان اقدر اوزن الشريط وكمان عشان لو عندي مياه ميعومش على وشها وانزل الشريط لحد ما اتأكد ان الطوبة " التُقل " رقدت بمعنى انها وقفت واشوف وصلت لحد فين واعرف العمق كام.
- ممكن اتسرق بإحدى الطريقتين :-
1 - العامل يسلمني الشريطة بتاعه اقيس بيه ارتفاع الخازوق وده ممكن يكون قاصص منه كام متر فيديني قراية كبيرة مغلوطة ومسروقة فلازم لو هستلم بالشريط بتاعهم اراجع عليه متر متر.
2 - لو هقيس بالشريط بتاعي ممكن العامل يغفلني ويبعدني عن الموقع دقايق معدودة ويقوم مكرمش جزء من الشريط ورابطه حولين بعضه بانتظام بسلك لحام خفيف بحيث وهو بيرفعه يروح ناطره نطرة خفيفة فيطلع الشريط مفرود وميبانش انه سرقني فلازم الأفضل اقف على ايده وهو بينزل الشريط بتاعي او انزله انا بنفسي والا هيخليني برضو كدة اقرأ قراية كبيرة ومغلوطة ويسرقني.
- خلي بالك :- حتى لو سرقني بالطريقتين وانا مكشفتش سرقته فممكن طول القفص الحديد يفضحه وخاصة في الخوازيق الساندة لأن طول القفص في الخازوق الساند يساوي كامل طول الخازوق لأن الساند شايل عزوم بينما طول القفص في العامل بيكون احيانا اقل من طول الخازوق ولكن برضو ممكن يسرقني ويقص من طول القفص فلازم أكون واخد بالي من كل حاجة.
- في استلام المواسير زي ما استلمت طولها هستلم قطرها واتأكد ان قطر الماسورة من برة هو قطر الخازوق اللي انا اعايزه لان ممكن ابقى عايز خازوق 50 سم والاقي المقاول جايب ماسورة 40 سم ويبرر اللي هو جايبه ده بإن الخازوق بعد الصب هينفش وقطره هيزيد والكلام ده مش مظبوط اوي.
- صحيح ان الخازوق بعد ما هيتصب ابعاده هتزيد وفي اتجاه نصف القطر بس الزيادة دي لا تتعدى 3سم ولا 4 سم بالكتير " علشان كدة انا كنت بستلم قطر الماسورة الخارجي " يعني الزيادة مش كبيرة وكمان الزيادة دي بتكون في الأماكن اللي التربة حولين الخازوق ضعيفة فلازم ابقى فاهم الكلام ده علشان اعرف ارد عليه لما يبرر انه جايب الماسورة 40 سم وانا عاوز اعمل خازوق 50 سم.
- وانا بستلم عمق الخازوق لازم اتأكد انه مرتكز على رمل بمعنى اني الاقي اخر حفر طالع عندي هو رمل ولو ملقتش رمل يبقى الخازوق ده مش خازوق ارتكاز.
- الرمل احيانا بيكون لونه متغير فممكن عشان اتأكد اغسله هجيب ازازة مياه فاضية واحط فيها الرمل وازود مياه وارج وافضي المياه وازود وارج وافضي المياه وهكذا لحد ما الاقي شكل الرمل المتعارف عليه او ممكن اعرف الرمل من الملمس الخشن بتاعه من غير غسيل.
- سؤال مهم / لو لقيت خازوق مش مرتكز على رمل هعمل ايه ؟
- لو القرار بايدي هحفر كمان متر زيادة لحد ما أوصل للمرل او لو مش بايدي هرجع للاستشاري.
صب الخرسانة :-
اثناء صب الخرسانة لازم اخد بالي من حاجتين :-
1 - مينفعش اصب الخرسانة من عِلوْ.
2 - مينفعش اصب الخرسانة في حفرة فيها مياه والا هلاقي الخرسانة اتغسلت " بمعنى ان هلاقي السن هبط تحت والاسمنت بقى عامل زي الهبو كدة ". طريقة الصب :- هصب عن طريق ماسورة صب قطرها 20 سم وهي عبارة عن مجموعة من المواسير مجمعة مع بعضها البعض طولها يمثل طول الخازوق او اكبر منه قليلا ولازم اقيس طول
ماسورة الصب بالشريط واتأكد من طولها.
- لو فوهة ماسورة الصب مفيهاش غطاء " طبة " وهي نازلة هلاقي المياه هتملى الماسورة والخرسانة هتتغسل وانا مش عايز كدة ، طيب هعمل ايه ؟؟
- زمان كان بيتم نزح المياه باستخدام البلف " انزله يتملي مياه واطلعه افضيه وانزله تاني وهكذا " لكن وُجد انه عند نزح المياه فوق التربة اللي هيرتكز عليها الخازوق يحدث لها فوران في الغالب وتصبح التربة مهيشة عشان المياه كانت عاملة تثبيت للتربة ولذلك كان لابد من إيجاد حلول أخرى غير النزح.
- الحل الأول :- هجيب اطباق صاج اعملها طُبب على قد الماسورة بالظبط واسد الماسورة بالطبق واربطه بكيس وشيكرتيون كويس جداً وانزل الماسورة داخل الحفرة وأول ما الاقي الماسورة لمست قاع الحفرة ارفعها شبر واحد عشان اسيب فرصة للخرسانة توقع الطبق وابتدي اصب ، وبكدة انا حليت مشكلة المياه وان الخرسانة متغسلش منها غير شبر واحد بس لسة الخرسانة بتتصب من عِلوْ.
- بس خلي بالك :- وانا بصب الخرسانة لازم تكون فوهة ماسورة الصب داخل الخرسانة وكل شوية ارفع وازحزح ماسورة الصب شوية بشوية واراعي ان فوهتها تفضل داخل الخرسانة لحد ما الخازوق يكمل ويتصب كله ، وهاخد بالي ان الخرسانة وهي بتتصب ترفع المياه لأعلى وده معناه ان عندي جزء من الخازوق من اعلى متعرض للمياه والجزء ده ضعيف وهيتكسربعدين.
الحل الثاني " طريقة الشيكارة المبلولة " :- هنزل ماسورة الصب كلها داخل الحفرة عادي فهيدخل جواها مياه عادي معنديش مشكلة ، وهجيب شيكارة اسمنت مبلولة ومتطبقة وادخلها في ماسورة الصب على قد دراعي واصب الخرسانة ، والخرسانة نازلة وزنها هيزق الشيكارة لاسفل واتابع الصب براحة وبالتالي الشيكارة هتفضل تنزل لغاية ما تلاقي مياه وساعتها اللي هيحصل ان الخرسانة هتزق الشيكارة فالشيكارة هتزق المياه فهتزيحها.
- ملحوظة :- في ناس مش بتحط طبق ولا شيكارة ولا حتى ماسورة صب اصلاً وبيصبوا الخرسانة ناشفة جوة البير على طول وطبعا الكلام ده غير صحيح وبيحصل ان الخرسانة بتتغسل والركام بيهبط لاسفل والاسمنت بيتحول لهبو زي الغ بار كدة والخازوق كأنه متصبش اصلاً.
- ملحوظة :- لازم نخرج كل مواسير الصب والمواسير الساندة من البير اثناء الصب بسرعة علشان ميبقوش جزء من الخازوق ويبقى صعب عليا بعد كدة اني اخرجهم.
- سؤال مهم / ازاي هخرج مواسير الصب والسند من البير ؟
- اول حاجة لازم ابقى فاهم انه مهم جداً ابقى عارف اطوال العُقل المكونة لمواسير الصب والسند قبل ما انزلهم في البير "هقيسهم بالشريط " وهحفظ طول أطول عقلة في ماسورة الصب واطول عقلة في ماسورة السند علشان لو عندي العُقل المكونة للمواسير اطوالها مختلفة ابقى عارف اكبر طول في كل واحدة قد ايه واكون في الأمان وبرضو عشان اريح نفسي من الحسابات اكتر من مرة.
- ماسورة الصب وانا بطلعها لازم اطلعها بطريقة تضمن ان فوهتها هتفضل داخل الخرسانة اللي بتتصب عشان امنع المياه من الدخول داخل ماسورة الصب.
- ماسورة السند وانا بطلعها لازم اطلعها بطريقة تضمن ان جوانب البير متتعراش ولا لحظة اثناء صب الخازوق لان جوانب الحفرة لازم تكون ملامسة للماسورة الساندة او ملامسة للخرسانة اللي بتتصب لكن لو الجوانب منها للهوا كدة فده معناه انها متعرية ومكشوفة وممكن توقع تربة داخل الخازوق وده مش صح.
- طيب انا مش فاهم لحد دلوقتي وعايز اعرف المفروض اخرج مواسير الصب والسند ازاي من البير بالتفصيل ؟؟
اولاً : اخراج ماسورة الصب :-
- وانا بصب الخرسانة سواء بطريقة الاطباق او بطريقة الشيكارة هلاقي ان الخرسانة بتعلى حوالين الماسورة فهبتدي ازحزح وارفع الماسورة لأعلى " بشرط فوهة الماسورة تفضل جوة الخرسانة " وعلشان اضمن كدة لازم ابقى عارف صبيت ارتفاع قد ايه خرسانة لحد اللحظة اللي هسحب فيها الماسورة لأعلى وطول اول عقلة من اعلى قد ايه - ليه اول عقلة من اعلى ؟ - لان دي العقلة اللي هسحبها وافكها او طول أطول عقلة وخلاص.
- لو هنفترض طول العقلة كان 2 متر يبقى لازم أكون صبيت في الحفرة خرسانة ارتفاعها اكبر من ال 2 متر علشان اضمن اني لما ازحزح وارفع الماسورة تفضل فوهتها داخل الخرسانة.
مثال لتوضيح حجم الخرسانة اللازم صبها قبل رفع عقلة من ماسورة الصب ارتفاعها 3 متر مثلاً بفرض ان قطر الخازوق 0.5 م وقطر ماسورة الصب 0.2 م وارتفاع الخازوق 18 م وارتفاع ماسورة الصب 19 متر مثلاً :-
اولاً : هزود على ال 3م نص متر مثلاً زيادة - ليه ؟ - زودت الارتفاع علشان يزود معايا حجم الخرسانة اللي هتتصب علشان لما اجي ارفع اول عقلة اللي طولها 3 متر تبقى فوهة الماسورة جوة الخرسانة الزيادة اللي انا زودتلها الارتفاع.
طول اول عُقلة + 0.5 متر = 3 + 0.5 = 3.5 م
- ثانيا احسب حجم الخرسانة في الحفرة.
مساحة الحفرة " مساحة مقطع الخازوق " x الارتفاع اللي حسبته في اولاً =ط𝟒x ( 0.5 ) 2 x 3.5 = 0.6872 م 3
- ثالثا ( هحسب حجم الخرسانة في ماسورة الصب.
مساحة مقطع الماسورة x ) ارتفاع الماسورة بالكامل - الارتفاع اللي حسبته في اولاً ( =ط𝟒x ( 0.2 ) 2 x ( 19 -3.5= 0.487 م 3
- رابعا: احسب اجمال حجم الخرسانة اللي هصبه.
- حجم الخرسانة في الحفرة + حجم الخرسانة في ماسورة الصب = 2870.6 + 0.487 = 1.1742 م 3 ≈ 1.20 م 3
- كل ما زودت كل ما أكون في الأمان ومتطمن اكتر.
- سؤال مهم / هعرف منين ان شوية الخرسانة اللي قصادي دول 3 م 3ولا 4 م 3، بمعنى تاني اكيّل الخرسانة ازاي ؟؟
- من المتعارف عليه في الخوازيق انها لازم تكون غنية بالاسمنت يعني المتر المكعب بياخد 8 شكاير والخلاطة بتاخد شيكارة يعني 0.125 م 3 خرسانة بيطلعوا من الخلاطة في المرة الواحدة يعني من الاخر هقسم حجم الخرسانة على 0.125 هعرف المفروض احط كام شيكارة اسمنت بحيث أكون وصلت للحجم المطلوب.
- من المثال اللي فوق لو جينا نحسب محتاجين كام شيكارة اسمنت هنقول
𝟏.𝟐𝟎𝟎.𝟏𝟐𝟓 = 9.6 شيكارة ≈ 10 شيكارة.
ثانيا : اخراج مواسير السند :-
- هشوف أطول عقلة في مواسير السند قد ايه واشوف ارتفاع الخرسانة اللي انا صبيتها وانا بطلع ماسورة الصب واذا كان ارتفاع الخرسانة اللي انا صبيتها وانا بطلع ماسورة الصب اكبر من ارتفاع أطول عقلة في ماسورة السند ده معناه اني اقدر ارفع ماسورة السند وانا متطمن ان الحفرة مش هتتعرى ولو لقيت ان ارتفاع الخرسانة اللي اتصبت وانا بطلع ماسورة الصب اقل من طول أطول عقلة معنى كدة اني محتاج ازود حجم الخرسانة في الحفرة بحيث يكون ارتفاعها اكبر من أطول عقلة في ماسورة السند وبعد كدة اسحب ماسورة السند عشان الحفرة متتعراش.
ملحوظة :- ممكن لو مش عايز اتعب نفسي واسرع في الشغل شوية اخد الأطول بين اكبر عقلة في ماسورة السند واكبر عقلة في ماسورة الصب واشتغل عليه.
ملحوظات اثناء الصب :-
- لازم الخرسانة تتصب داخل ماسورة الصب فقط والا ماسورة الصب مش هيكون ليها لازمة بقى وعلشان كدة بنخلي العامل يستخدم قمع له زور يدخل جوة ماسورة الصب وهنلاقي العمال مش بيحبوا القمع عشان كل شوية بيزور والخرسانة بتقف في زوره وبيحتاج العامل يسلكه كل شوية.
- الخرسانة بتاعت الخازوق بعد الخلط مينفعش تترمي على الأرض عشان متختلطش بالطينة ولازم يكون عند طبلية تتحط عليها الخرسانة والموضوع ده بيعتمد على هل هحرك الخلاطة كل شوية جنب الخازوق اللي بيتصب ولا هتفضل في مكانها ثابتة وهحرك الخرسانة اللي هتتخلط على براويطة لحد مكان الخازوق اللي بيتصب.
- لو هيصب الخرسانة في البراويطة اول بأول " والخلاطة مش هتتحرك " هينقل الخرسانة من عند الخلاطة بالبراويطة لحد مكان صب الخازوق واكُبها في نص برميل صاج مشقوق محطوط جنب الخازوق.
- لو مش هستخدم براويطة تستلم الخرسانة من الخلاطة اول بأول " والخلاطة مش هتتحرك " يبقى هعمل أرضية خرسانة عادية جنب الخلاطة وانزل عليها الخرسانة وبعد كدة ابقى انقلها سواء بالبراويطة او بأي طريقة أخرى لمكان الخازوق اللي هيتصب.
- لو هحرك الخلاطة عند كل خازوق هصبه يبقى هنزل الخرسانة على نص برميل صاج مشقوق.
القفص الحديدي " Steel Cage -:
- هبدأ انزل القفص بعد ما اصب الجزء اللي من غير حديد وبعد كدة اسقط القفص بين ماسورة السند وماسورة الصب ،
بلاحظ ان القفص بيغطس وبيهرب لتحت وبيغوص في الخرسانة لان خرسانة الستراوس بتكون طرية وعشان كدة هكون
صابب متر خرسانة زيادة على الخرسانة اللي المفروض تكون من غير حديد وتفضل دايما عيني ع القفص عشان ميهربش وفي ناس بتربطه ب Wire علشان ميهربش.
- لو حصل والقفص هرب مني هعمل محاولة وهي اني هجيب سيخ حديد واعمله تنية نص متر " حاجة زي جنش كدة "
وانزل السيخ لحد ما اعرف مكان القفص وبعدها اظبط وضعية السيخ واحاول ارفع القفص واحيانا المحاولة دي بتنجح لو
القفص كان غطسان متر ولا مترين بالكتير واحيانا بتفشل لو كان غطس كتير ، ساعتها اعمل ايه ؟؟
- هجيب جزء من قفص خازوق تاني طوله اكبر من المسافة اللي غطسها القفص ب 1 متر تقريب ا والمتر ده هشيل الكانات . منه وافتح الحديد الرئيسي بتاع المتر ده شوية واسقطه في الحفرة.
سؤال مهم / ليه فتحت الحديد الرئيسي بتاع المتر ده شوية قبل ما اسقطه ؟؟
- علشان الحديد بتاع الجزء اللي سقطته وحديد القفص اللي غطس يركبوا في بعض عاشق ومعشوق عشان اضمن انه حصل ترابط بين القفصين.
ملحوظة هامة :- لازم اتأكد ان القفص قطره الداخلي يسمح بمرور ماسورة الصب من خلاله معنى كدة اني لازم أكون عارف الفاضي بتاع الطوق قد ايه.
سؤال مهم / هعرف منين قيمة الفاضي بتاع الطوق قد ايه ؟
- علشان اعرف الموضوع ده لازم أكون عارف شوية حاجات مهمة :-
- الغطاء الخرساني " Cover " للخازوق يتراوح من 5 سم ل 7 سم على حسب التصميم ويتوقف ذلك على وجود مياه جوفية من عدم وجودها.
- الكانات ال Spiral في القفص اقل حاجة 8 مم ما لم يذكر خلاف ذلك.
- اقل قطر لحديد الخازوق الرئيسي هو 12 مم زي الاعمدة.
- قطر الطوق لا يقل عن 16 مم ، ليه ؟
لأن هو اللي بيحافظ على القطر بتاع القفص كله وبيحمي القفص من حدوث انبعاج.
- ممكن المقاول علشان ميعملش القطر بتاع الطوق بحديد قطره 16 مم يقترح يعملي طوقين 8 مم جنب بعض وطبعا الكلام ده غلط - ليه ؟ - علشان هيكون الطوق ضعيف وهيحصل انبعاج للقفص وقطره هيزيد في اتجاه وهيقل في اتجاه وهلاقي ان ال Cover هيضيع.
- لازم اسيب خلوص 2سم يمين و 2 سم شمال حوالين ماسورة الصب - ليه ؟ - علشان القفص ينزل مستريح.
- من الكلام اللي فات ده استنتج ان مينفعش اعمل خازوق ستراوس قطره اقل من 40 سم يعني 30 مينفعش.
20 سم + 4 سم + ) 2 x 1.6 ( سم + ) 2 x 1.2 ( سم + ) 2 x 0.8 ( سم + ) 2 x 0.5 ( سم = 32.60 سم
ماسورة صب خلوص طوق حديد رئيسي كانات Cover
- يعني اقل قطر مسموح ليا بيه بالنسبة للحسابات اللي عملتها هو 32.60 سم يعني تقريبا 40 سم علشان كدة قولنا 30
مينفعش.
- ملحوظة مهم جداااااااااا :- في خوازيق ال C.F.A عشان اسهل حركة القفص في الخرسانة " عشان القفص كله ينزل مرة واحدة بعد ما اصب خرسانة الخازوق كله " بلاقي ان القفص جزء منه من اسفل بيكون مدبب في حوالي 0.5 م والكلام ده مش بنعمل في الستراوس ولا في النص ميكانيكي.
- احيانا بنستخدم بسكوت او اسمه تخانات عشان تحافظ ليا على ال Cover ، امتى بالتحديد ؟
- لما بيكون عندي مواسير ساندة عشان لو حطيت البسكوت وانا عندي مواسير ساندة هيسهل حركة القفص الحديد داخل
الماسورة لكن لو معنديش مواسير ساندة وحطيت بسكوت هلاقي البسكوت خلى حركة القفص في التربة صعبة وبقى عامل ليا عائق.
- بما ان معدل إنتاجية الاستراوس قليلة جد اً زي ما قولنا وبتوصل لخازوق واحد في اليوم الواحد فمعنى الكلام ده اني عندي مخلفات الحفر في اليوم الواحد مش هتكون كبيرة ، ومش هتزيد عن 3 م3 وعشان كدة هنضف الموقع من مخلفات الحفر بتاعت الخوازيق كل أسبوع " كل يوم خميس بالليل ".
- ملاحظة فنية في استلام عمق الحفر :-
- بدل ما اعمل عمق الحفر بتاع الخازوق استلمه من وش الأرض الطبيعية يفضل اني اعمل شِرب موحد اقيس منه عمق
الحفر لكل الخوازيق.
سؤال مهم / هعمل الشرب ازاي ؟؟
- هدق مسمار في بداية ونهاية الجدران المحيطة ويكون المسمار ده على منسوب 1 م محسوب من الصفر المعماري يعني مرفوع شوية عشان ميتغطاش ولا يكون عندي عوائق وبعد كدة هشد خيط بين كل مسمارين واعلّم مكان الخيط ع الحيطة ب Spray والخازوق اللي عايز استلم عمقه هشد فوقيه خيط من الشرب اللي انا عملته واستلم منسوب الحفرة متنسب للشرب ده.
- بمعنى ان لو الخازوق عمقه 15 م من منسوب الصفر المعماري وانا كنت عامل الشِرب على 1 م ببقى كدة هستلم العمق من الشرب 16 م وليس 15 م.
- لو قابلني عائق وانا بحفر هلاقي العامل بيقولي ان الجلبة بتزيق ومش راضية تحفر وهروح لبتاع التربة اجيب منه مسمارضخم افتت بيه العائق ده وبعدها اشيل المسمار ده واكمل حفر بالجلبة عادي جداً.
- طول القفص الحديد بيحددهولي استشاري التربة لان هو اللي عارف شكل ال Soil Profile عامل ازاي وعارف أماكن التربة الضعيفة فين ، والقفص بيكون في الجزء الفوقاني منه فقط عشان ببقى خايف من الانبعاج والانفعال العرضي للخازوق في أماكن التربة الضعيفة.
ماكينة النص ميكانيكي " طريقة التنفيذ والاستلام " :-
- تعمل بالهبد :- بسيب البلف ينزل تحت تأثير وزنه فبيعمل حفر ولكن ممكن بالهبد ده أوقع البيوت اللي حوليا ومفيهاش أي فايدة ليا ، المقاول بس اللي بيستفيد لانه ممكن يعمل خازوقين في اليوم ولكن الخازوق الناتج بنفس ردائة الخازوق الاستراوس.
- استخدام ماكينة النص ميكانيكي خطير جد اً لأن البلف وزنه حوالي 700 كجم ولو وقع على حد هيموته.
- دايما يُفضل معملش خوازيق نص ميكانيكي خالص لكن لو اضطريت ممكن استخدمه في الأراضي الزراعية اللي مفيش حواليها جيران وممكن مع انه لا يفضل لو عندي ارض ليها جيران احفر ناحية الشارع بيها لكن ناحية الجيران لازم بقى استراوس عشان ميحصلش مشاكل في المباني المجاورة.
- التأكيس بيكون بالبصمة بتاعت البلف ، ازاي ؟؟
- بيكون عندي مكان الخازوق " مركزه " سيخ حديد ، برمي شوية رمل حوالين السيخ وظبط مركزية البلف مع السيخ بعيني وانزل البلف يبصم دايرة حوالين السيخ لو لقيت الدايرة مركزها السيخ يبقى تمام كدة ظبطت التسامد ولو ملقيتش السيخ في مركز الدايرة يبقى امسح البصمة واعملها من جديد وهكذا لحد ما تظبط.
استلام طول الخازوق :-
- ليهم طريقة غلط في الاستلام وهي انهم بيقطعوا خشبة طولها 1 متر كدة ويقعدوا يقيسوا طول ال Wire وطول البلف وهما طالعين من الحفرة وده غلط علشان هيسرقوني وانا مش واخد بالي والعامل هيحرك ايده وهو بيقيس.
- ممكن اسيبهم يعملوها كمؤشر ليهم هما وانا استلم بالشريط بعدهم واتأكد من كلامهم اذا كان صح ولا غلط.
ماكينة ال C.F.A " Continuous Flight Augar -: "
- معدل الإنتاج بتاعها عالي ممكن يوصل لحد 25 خازوق في اليوم وبدون ضوضاء ولا اهتزازات ولكن محتاجة معلومات عن إدارة الموقع لأنه غلط اني اعطلها عشان هتحاسب يعني مثلأً لازم انضفلهم الموقع اول بأول كل يوم عشان بيحفروا عدد كبير كل يوم ولو مخلفات الحفر اتراكمت هعطل الماكينة وهيحاسبوني ع العطلة.
- ال C.F.A مش محتاجة مجهود في الاشراف والاستلام زي ما محتاجة إدارة موقع.
- عندي شوية حاجات لام أكون محضرها ومخلصها قبل ما الماكينة تيجي الموقع بيومين او تلاتة كمان ، زي ايه ؟؟
- لازم أكون محضر أماكن الخوازيق لأن الماكينة بتعمل خازوق كل نص ساعة تقريبا فلو أجلت تحضير أماكن مراكز
الخوازيق لحد ما الماكينة توصل الموقع هعطلها جداً جداً.
- الاكسات " مراكز الخوازيق " هتعاقد مع مساح يعملها بتوتال ستيشن.
- وانا بعلم أماكن خوازيق ال C.F.A مش بعلم سطحي لان الماكينة بتحرت في الأرض حوالي 20 سم اثناء استكشاف الموقع فقبل ما المساح ييحي هكون مقطع عدد اسياخ بطول 20 سم ولا 30 سم عددها يساوي عدد الخوازيق ، المساح يشاورلي ع النقطة هروح عليها واعمل الآتي :-
- هخلي العامل يدق السيخ بحيث ميبانش منه حاجة وبعد كدة هحفر حواليه بشاكوش نجارين صغير " بالسن بتاعه " لحد ما اشوف السيخ يظهر أقوم ادقه تاني وهكذا لحد ما ادفن السيخ 20 سم وبعد كدة احفر اخر مرة واحط مونة حوالين السيخ "عشان ميتحركش شمال ولا يمين " بس يكون جزء من السيخ ولو 1 سم باين من المونة عشان لما اجي احفر محتاجش اكسرالمونة ، بعد كدة هردم حوالين السيخ اللي دقيته برملة مباني عشان تبقى علامة مميزة ان هنا خازوق.
- لما باجي ادفن السيخ قبل ما اردم عليه بحط معاه كيس فيه ورقة مكتوب عليها رقم الخازوق تحت منه خط - ليه بحط خط تحت الرقم ؟ - علشان متلغبطش في الأرقام زي ال 8 وال 7 مثلاً ، واثناء حفر كل خازوق الماكينة هتحفره اعلم عليه علامة X في اللوحة عشان ابقى عارف فين الخوازيق اللي خلصت وفاضل ايه مخلصش.
- لازم أكون منظم عشان الماكينة مش بتحفر بالترتيب وبتمشي مسار معين كامل تخلصه كله وبعدها تروح للمسار اللي بعد منه وهكذا.
- سؤال مهم / اثناء صب خوازيق ال C.F.A ممكن جوانب الحفرة تهيل ويحصل فصل في الخازوق " هيتخلله طين وتراب "، هعرف ازاي ان الجوانب هيلت وحصل فصل على الرغم من اني مش شايف ايه اللي جوة الحفرة وهتصرف ازاي ؟؟
- بلاقي ان الخازوق خد خرسانة حجمها اقل من حجم الخرسانة اللي من المتوقع ان الحفرة تاخده ووقتها لو كنت صبيت
جزء من الخازوق هخلي الماكينة تحفر تاني في شوية الخرسانة اللي اتصبت وتطلعهم تاني كأنهم تراب وكأني بحفر الخازوق من جديد.
سؤال مهم تاني / ازاي المساح بيحددلي أماكن مراكز الخوازيق باستخدام ال Total Station ؟؟
- بيكون عنده نقطة ثابتة في الموقع بيربطها باللوحة ويحدد منها أماكن مراكز الخوازيق.
سؤال مهم / ليه بنحط مونة حوالين السيخ اللي بيحدد مركز الخازوق ؟؟ وليه بنخلي جزء من السيخ ولو 1سم ظاهر من المونة؟؟
- بنحط مونة حوالين السيخ علشان العامل بيدور على مكان السيخ باستخدام فأس يشبه فأس الفلاحين وبالتالي دور وجود
المونة حوالين السيخ انها بتثبت السيخ علشان ميتحركش من مكانه لو الفأس خبط فيه اثناء البحث عنه ، وبنخلي جزء ظاهر
- من السيخ فوق المونة علشان محتاجش اني اكسر المونة عشان لو جيت اكسر المونة السيخ هيتحرك من مكانه والنقطة
هتضيع مني.
- خلي بالك :- قولنا قبل كدة بنحط مع السيخ واحنا بندفنه ورقة عليها رقم الخازوق واحط تحت الرقم خطين والورقة دي بتكون في كيس بلاستيك.
ملحوظة مهمة :- ماكينة ال C.F.A مش بتعمل الخوازيق بالترتيب لأن لازم يكون عندي مسافة معينة لا تقل عن 1.5 م بين الخازوق اللي خلصته والخازوق اللي بعده - ليه ؟ - علشان لو قليت عن المسافة دي هلاقي ان البير هيفتح وممكن الاقي خرسانة الخازوق اللي اتصب نفدت عندي في البير اللي انا بحفره دلوقتي.
سؤال مهم / طيب اعمل ايه علشان اتجنب المشكلة دي ؟؟
- لازم أكون منظم جداً والخازوق اللي يخلص اعلم عليه X في اللوحة انه خلص عشان ابقى عارف خلص قد ايه وناقص قد ايه لسة مخلصش علشان لو الماكينة كانت مشيت من عندي من الموقع واكتشفت بعد ما مشيت وبعد ما حفرت التربة بين الخوازيق ولقيت اني نسيت خازوق هيكون عندي مشكلة كبيرة جداً وهبقى عايز اردم اللي حفرته واجيب الماكينة يوم تاني عشان تعملي الخازوق اللي نسيته والكلام ده هيكون مكلف جداً جداً لأن الماكينة يوميتها اصلاً غالية.
الترحيل :- لازم استلم تسامد البريمة مع اكس الخازوق صح والا هيحصل ترحيل في أماكن الخوازيق.
سؤال مهم / طيب على فرض حصل ترحيل هعمل ايه ؟؟
- لازم ابقى عارف ان الكود بيسمحلي بترحيل قدره 0.1 من قطر الخازوق واللي بيصمم بيكون عامل حسابه على كدة ، لولقيت الترحيل في الحدود المسموحة ممكن اقبله ومعنديش مشكلة ، ولو لقيت الترحيل اكبر من المسموح بيه في الكود لااااازم ابلغ المهندس المصمم وهو هيعمل إعادة تصميم " Redesign " للاساسات على أساس الخوازيق اللي اتنفذت بالفعل "As built ."
سؤال مهم / هعرف منين ان حصل عندي ترحيل ؟؟
- بعد تنفيذ الخوازيق بنعمل مقارنة ومطابقة بين اللي اتنفذ بالفعل وبين اللي كان المفروض يتنفذ واعمل لوحة ال As built واشوف من المقارنة حصل ترحيل ولا لأ.
ملاحظات :-
- الترحيل ممكن تكون قيمته كبيرة كبيرة جداً وده هيسببلي مشاكل كبيرة جداً وغالبا ما يكون الترحيل الكبير ده عيب من
المساح لذلك لازم اتعاقد مع مساح كبير وعنده خبرة وموضع ثقة.
- المسافة بين حافة الخازوق وحافة القاعدة " Piles Edge Distance -
← من حافة الخازوق لحافة القاعدة = D
← من مركز الخازوق لحافة القاعدة = 1.5 D
- الحديد بيتم توريد للموقع اما يكون طول السيخ 12 متر سيخ كامل على بعضه ومفرود واما يكون برضو 12 متر سيخ
كامل لكن متني نصين زي حرف ال U وده بيختلف على حسب سهولة وصعوبة النقل فقط بالإضافة الي ان النوع التاني
المتني ده بيحتاج استعدال فبيعمله الحداد بمصنعية إضافية حوالي من 200 ل 300 جنيه/طن ) بتاريخ شهر 7 لسنة 2018
- ممكن كنوع من الشطارة والتوفير اشوف لو عندي هالك وفُضل من حديد القفص استخدم الفُضل دي في التأكيس بدل ما
اشتري حديد مخصوص للتأكيس.
- اشتريت الحديد خلاص وعملت التأكيس سواء اشتريت له حديد مخصوص او عملته بالحديد اللي كان هيطلع هالك من حديد القفصان ، الخطوة اللي بعد كدة اني هكلم الشركة بتاعت الماكينة تبعتلي الحداد يعملي حديد القفصان لان القفصان لازم تكون جاهزة قبل ما الماكينة تيجي بكام يوم.
- ممكن الحداد اخليه يخلصلي حديد القفصان كلها مرة واحدة قبل ما الماكينة تشتغل خالص وده لا يفضل عشان اتجنب حدوث زحمة في الموقع.
- ممكن اخليه يعمل شوية قفصان قبل ما الماكينة تشتغل وكل ما يقربوا يخلصوا اخليه يعمل شوية قفصان غيرهم يكفوني 3ولا 4 أيام عشان الماكينة متعطلش.
- لازم القفصان اللي تتبقى من الماكينة في نهاية يوم عمل معين تكفي ان الماكينة تشتغل اليوم اللي بعده والحداد ييجي في
اليوم ده يعمل اقفاص تاني للشغل الجديد.
تربيط عناصر القفص :-
- القفص الحديدي للخازوق هو الحديد الوحيد اللي مسموح باستخدام اللحام معه " الخازوق هو العنصر الانشائي الوحيد
المسموح بتربيط حديده باستخدام اللحام ".
- يمكن تربيط القفص باللحام او بسلك الرباط ويكون الربط مُحكم عشان لو القفص ضعيف ومش متربط كويس هيتبهدل وانا بنزله في الخرسانة.
- احيانا الاستشاري في المشاريع الكبرى يفرض عليا ان القفص يتعمل كله بالرباط ومستخدمش اللحام عشان بيخاف اللحام يضعف قوة السيخ الحديد ويغير من خواصه.
- القفص نهايته من اسفل مدببة - ليه ؟ - لسهولة اختراق الخرسانة وانا بنزله.
- لو هلحم الكانات الحلزونية مع الحديد الرئيسي في الصف والعمود الواحد هلحم نقطة تقاطع وافوت نقطة وهكذا - ليه ؟ لان كثرة اللحام مشكلة.
مواصفات التقفيصة من الكود :-
- تصنع التقفيصة بعمل الاطواق من حديد 37 ( St. 37 ( " عالي المقاومة " وتكون المسافات بين الاطواق من 1 م ل 3 م وعادة ما تؤخذ 1.5 م ويف ضل الا يقل قطر الاطواق عن 16 مم ثم يُرص الحديد الرئيسي حول الاطواق على مسافات متساوية بحيث لا تقل المسافة بين الاسياخ عن 15 مم ثم تلف الاسياخ الحلزونية حول الاسياخ الرأسية بحيث لا تقل الخطوة " Pitch " عن 15 مم ويتراوح قطر الاسياخ الحلزونية من 8 مم ل 10 مم.
- في حالة القفص الحديدي الطويل < 12 م يستدعي تصنيعه عمل وصلات في الاسياخ الرأسية ويحدد طول ركوب الوصلة اما بعمل تجربة شد على عدد 2 سيخ ملحومين من الجهتين بطول 20 سم ويكون اللحام متصلاً بكامل طول الوصلة ، او يكون طول الوصلة 20 مرة قطر السيخ وفي هذه الحالة يكون طول اللحام من الجهتين 10 سم كل 20 سم من طول الوصلة وبحيث لا يقل في مجموعه " طول اللحام " عن 20 سم ويمكن عمل وصلات جميع الاسياخ الطولية للتقفيصة في قطاع واحد.
- الكانات بتكون Spiral ، لو انا عايز احسب طول شوية الحديد اللي قطرهم 8مم ولا 10 مم اللي هعمل بيه الكانة الحلزونية، احسبه ازاي ؟؟
- هعتبرها كأنها كانة دائرية " والحل ده صح لو الخطوة صغيرة 10 سم مثلا ".
- لازم في ذهني اربط بين أماكن تواجد الماكينة في الموقع ومكان نواتج ومخلفات الحفر وأماكن تشوين القفصان ولازم
ادير الكلام بشكل كويس عشان اكسب وقت واوفر مجهود.
فمثلاً :- انا عندي نواتج الحفر بتكون كميتها كبيرة في اليوم الواحد فلازم اتخلص منها كل يوم بالليل فبكون متفق مع عربية ولودر تيجي تشيل نواتج الحفر فلازم اسهل عليهم وابقى عارف ان العربية النقل مستحيل هتنزل الأرض بتاعتي لكن اللودر ممكن ينزل فالاسهل اني اخلي نواتج الحفر قريبة من او ناحي الطريق اللي هتقف عنده العربية عشان اللودر ينقلها من الأرض للعربية بسرعة وسهولة وميفضلش رايح جاي ويقل معدل الإنتاج وابقى عارف ان لوعندي شارعين واحد فيهم جانبي والتاني رئيسي هحط التراب ناحية الشارع الجانبي عشان معطلش الرئيسي ولو عندي شارع واحد رئيسي هضطر احط التراب ناحيته والماكينة هتحفر من جوة لبرة واخد بالي ان المكان اللي هحط فيه التراب هبعد عنه القفصان ، علشان كدة لازم احدد بنفسي المكان اللي الماكينة هتبدأ منه.
- يُفضل وده مطلوب اني قبل اليوم اللي الماكينة هتشتغل فيه بكام يوم " ممكن في اليوم اللي هعمل فيه التأكيس " اعلم مكان اول خازوق انا محدده للمكنة تبدأ بيه بعلامة مميزة زي طوبة او سيخ سطحي عشان الماكينة اول ما تيجي تشتغل على طول وفي ناس بتستخدم شريطة طالعة من عند السيخ المدفون لسطح الأرض بدل الطوبة والسيخ السطحي واثناء ما المكنة شغالة في خازوق بكون دورت على الخازوق اللي بعده ولقيته عشان انجز واساعد الماكينة .
التسامد " Orthogonality -: "
- الغرض من ضبط التسامد ان يكون سن البريمة فوق السيخ مباشرة لضمان عدم حدوث ترحيل.
- الماكينة بتخلص مسار معين وتنقل للي بعده.
- البريمة عبارة عن ريش حلزونية في مركزها ماسورة لا يقل قطرها عن 15 سم وهي ماسورة جوفاء وعبارة عن أجزاء " عُقل " متوصلة مع بعض.
- لو فوهة الماسورة اللي في مقدمة البريمة اتسابت كدة مفتوحة هيدخل فيها تراب وانا مش عايز كدة فبنلاقي ان الفوهة ليها طبة مربوطة بسلسلة في فوهة الماسورة وبيتم غلق هذه الطبة اثناء الحفر بإحكام وبيتم فتحها اثناء الصب وبعد الصب بنطلعها لأنها غالية ومش هجيب لكل خازوق طبة.
سؤال مهم / لو عايز اظبط التسامد بقى هعمل ايه ؟؟
- بخلي فوهة البريمة وهي مقفولة بالطبة على ارتفاع 0.5 متر مثلاً من السيخ اللي عايز اظبط التسامد عليه واحاول اظبط التسامد بعينيا مبدئيا وبعد كدة العامل بيكون معاه ميزان الشاغول " بلبل " وهو عبارة عن خيط في مقدمته حاجة تقيلة شوية شبه المخروط " تقل على شكل مخروط ".
- بخلي العامل يحط صباعه في الخيط " عند مركز ثقل او المركز الهندسي للطبة " ويكون الميزان حر الحركة ويسيب الميزان ينزل تحت تأثير وزنه ولو نزل مركز الميزان عند مركز السيخ يبقى تمام ولو منزلش عند المركز يبقى التسامد لسة عايز يتظبط.
ملحوظة :- حركة الماكينة صعبة وبتكون قدام او لورا فقط والحركة يمين وشمال ف منتهى الصعوبة ، عشان صعوبة حركة الماكينة العامل بيكون عايز يسرقني ويمسك الخيط من مكان غير مركز الطبة عشان ينزل عند مركز السيخ وخلاص ولو مخدتش بالي وقعدت معاه وهو بيظبط التسامد هيحصل الترحيل اللي قولنا عليه في الأول.
مكونات ماكينة ال C.F.A -:
1 - دولاب :- زي أسطوانة مشقوقة نصين بتفتح وتقفل حوالين مسمار مثبت على محيطها الخارجي " ناحية ال Tower من برة لجوة ".
- فايدته :- بيكون مفتوح اثناء الحفر وأول ما اخلص حفر واجي احرك الماكينة من مكان خازوق لمكان خازوق اخر بقفله
عشان احافظ على البريمة من الكسر لو اصطدمت بأي جزء من الأرض لأن الأرض غير مستوبة في الغالب " كأنه جراب للبريمة ".
2- Tower :- متثبت فيه ال Rotary وال Rotary طالع منه البريمة.
3 - Rotary :- ماتور به اسلاك ومعدات وبيتحرك طالع نازل زحلقة ع ال Tower وهو اللي بيدور البريمة.
4 - Auger :- بريمة الحفر وسبق تعريفها.
ملحوظة :- ال C.F.A بتحفر وهي نازلة وبتصب وهي طالعة معنى كدة اني مش هعرف استلم عمق الحفرة بالشريط امال هعرف العمق ازاي ؟؟
- هكون واقف اثناء ما العمال بيركبوا البراريم واعرف طول كل بريمة كام واعرف مجموعهم كام ولازم مجموعهم يطلع اكبر من عمق الحفر اللي انا عايزه بمتر ولا مترين - ليه ؟ - عشان لما يبقى كامل طول البريمة هو عمق الحفر اللي انا عايز احفره هلاقي ان اثناء ما البريمة وصلت لعمق الحفر اللي انا عايزه ال Rotary اصبح على وش الأرض وده مش مرغوب فيه لانه كدة هيبوظ فبلاقي اني لو عايز مثلاً عمق حفرة 30 م هلاقي ان العمال جايبين براريم طولها 32 م مثلاً عشان يحافظوا ع ال Rotary هقوم انا استغل كدة في استلام عمق الخازوق ، ازاي ؟؟
- لو قيست طول البريمة لقيتها مثلاً 32 م وانا عايز احفر 30 م يبقى علشان أقول ان الحفرة اللي قدامي دي عمقها 30 م لازم الاقي ال Rotary بيبعد عن وش الأرض 2 م ، كل الكلام ده هعمله اول خازوق بس وهقيس ال 2 م بالشريط اول مرة بس وبعد كدة هحط علامة مميزة " شحمة ولا شريطة " عند المكان اللي فيه ال Rotary اعلى من وش الأرض ب 2 م واستلم عليه من غير شريط بقى في الخوازيق اللي بعد كدة.
- قولنا قبل كدة ان الماكينة بتصب وهي طالعة لكن بشرط فوهة الماسورة داخل الخرسانة برضو وكمان لو البريمة متسرعة اثناء الخروج ممكن جزء عندي فيه جوانب التربة تتعرى ويحدث تهييل لجوانب الحفرة والتراب يدخل بين الخرسانة ويحدث انفصال في جسم الخازوق ودي مصيبة والخازوق ده بيحصل فيه هبوط كبير ممكن يكسر القاعدة ويشرخ المبنى والمشكلة اني مش شايف اللي بيحصل جوة الحفرة.
- في خوازيق ال C.F.A ريشة البريمة هي قطر الخازوق ، معنى كدة اني لازم اقيسها عشان متسرقش لأن ممكن المقاول يكون بيحفر ببريمة 50 سم وانا طالب منه خازوق 60 سم لانه ممكن يكون عنده بريمة 60 سم وهو مش عايز يقولي انه معندوش عشان الشغلانة متطيرش منه.
صب الخرسانة :- بعد ما حفرت واستلمت العمق هبتدي اصب الخرسانة وبيكون عندي مضخة كبيرة ثابتة في الموقع خارج منها خرطوم متوصل بالماسورة اللي جوة البريمة والماكينة تفضل تخلي البريمة تصب وتطلع لحد ما الخازوق يخلص صب.
سؤال مهم / ايه الحاجات المهمة اللي المفروض اخد بالي منها اثناء عمل الماكينة ؟؟
1 - اتأكد ان البريمة متميلش لانها لو كانت مايلة هتعملي خازوق مايل وهيكون عليه قوة وعزم يزيدوا عن قدرة تحمله فممكن الخازوق لو اتنفذ مايل يتكسر.
- اقصى ميل مسموح به في الكود هو 0.01 من طول الخازوق وده اكبر ميل معرفش اميزه بالعين المجردة ولذلك أي ميل هيزيد عن كدة هلاقيني قدرت اشوفه ولاحظه بعينيا ، ومن الاخر طالما عينيا لمحت ميل وميزته يبقى مرفوض
- ممكن استخدم اللمح بمعنى اني اقف في مكان اقدر وانا واقف فيه اقارن رأسية البريمة مع رأسية حاجة تاني وراها مثل خط شبابيك او خط بلكونات في واجهة بيت مقابل مثلاً او حد مبنى مقابل.
- لو لقيت عندي ميل هوقف الشغل.
2 - اتأكد ان حجم الخرسانة اللي نزل الحفرة اكبر من او يساوي تكعيب الخازوق عشان اعرف الجوانب هيلت ولا لأ.
سؤال مهم / ليه الحفرة ممكن تاخد خرسانة حجمها اكبر من تكعيب الخازوق ؟؟
- لان الخازوق بيتمدد في اتجاه القطر ويزيد 3 او 4 سم ولكن ليس بكامل الخازوق وانما في مواضع التربة الضعيفة فقط ، ممكن كمان الحفرة يكون بها كهوف او اخاديد وممكن الكهوف او الاخاديد دي تاخد خرسانة حجمها مساوي لحجم الخازوق نفسه في بعض الأحيان.
سؤال مهم / طيب لو الحفرة خدت خرسانة حجمها اقل من تكعيب الخازوق ؟؟
- لو الحفرة خدت خرسانة اقل من تكعيب الخازوق ده معناه ان الجوانب هيلت اثناء الصب وهنا لازم أوقف الشغل ولو ليا
الحق في اتخاذ القرار هخلي العامل يفك الخازوق ويحفره من جديد " بيحفر في الخرسانة اللي اتصبت زيها زي التراب " ويصب الخرسانة من جديد بدون ما يسرع البريمة ولو معنديش فرصة اخد القرار هكلم مديري واشوف هيقولي ايه لو طلب مني اني اتصرف هفك الخازوق واصبه من جديد ولو قالي اسيبه يبقى هسيبه واكتب ملاحظة في ضهر لوحة الخوازيق ان الخازوق ده خد خرسانة اقل من تكعيب الحفرة ويكون ده اول خازوق يتم اختباره لكن لو شغال شغل مفيهوش استشاري طبعا لازم افك الخازوق لان مفيش اختبارت هتتعمل.
- علشان اعرف الحفرة خدت خرسانة اقل ولا اكتر لازم احسب حجم الحفرة وحجم الخرسانة اللي نزلت الحفرة بالفعل.
حجم الحفرة ) م 3 ( = مساحة مقطع الحفرة x ارتفاعها
Volume =𝝅𝟒x 0.52 x 30 = 5.9 m3
- كدة انا عرفت حجم الحفرة يتبقى ليا حجم الخرسانة اللي نزلت الحفرة ، اجيبها ازاي ؟
- قولنا بيكون عندنا في الموقع ماكينة ضخ كبيرة هي اللي بتضخ الخرسانة للخازوق ، الماكينة بتاعت الضخ دي بيكون من اهم مكوناتها حوض كبير متغطي بشبكة حديد - ليه ؟ - علشان الحوض ده بكُب فيه الخرسانة فلو عندي زلطة كبيرة عدت من الشبكة ونزلت للحوض ممكن تبوظ المضخة ، الحوض ده بيكون متوصل بحوض صغير موجود اسفل الحوض الكبير وخارج منه كوع والكوع ده خارج منه الخرطوم ، المهم ان الحوض الصغير ده بيكون فيه مكبس " Piston " بيضخ خرسانة من جوة الحوض الصغير عشان يغذي الخرطوم اللي بيودي الخرسانة للخازوق ، المكبس ده بيضخ الخرسانة بكمية معينة " حجم معين " في الضخة الواحدة ويهمني جداً اعرف حجم الخرسانة في الضخة الواحدة قد ايه عشان لو عرفت حجم الضخة الواحدة وانا معايا حجم الخازوق " حجم الحفرة " هقسم حجم الحفرة على حجم الضخة الواحدة عشان اعرف عدد الضخات اللازمة لاستنتاج خرسانة حجمها يساوي حجم الخازوق لو لقيت بعد ما حسبت عدد الضخات ده ان الخازوق اتصب بعدد ضخات اكبر يبقى كدة الحفرة خدت خرسانة حجمها اكبر من حجم الخازوق ولو لقيته اتصب بعد عدد ضخات اقل اعرف انالخرسانة اقل من حجم الحفرة وان الجوانب كدة هيلت.
سؤال مهم / طيب انا هعرف حجم الضخة منين ؟؟
- في اليوم اللي الماكينة هتيجي فيه الصبح هروح اسأل الفني اللي واقف ع المضخة حجم الضخة الواحدة قد ايه ، مش
هيجاوبني فهخليه يفك الخرطوم ويكشف الكوع واجيب علبة صفيح واخلي عامل يمسكها وأقول للفني اللي واقف ع المضخة يديني ضخة في العلبة الصفيح دي وبعد ما يديهالي احسب حجمها وهو ده حجم الضخة اللي انا بدور عليه.
مراحل تنفيذ خازوق ال C.F.A -:
- كل ما يخص التنفيذ : إنتقل من هنا
____________________________________________________
تعليقات
إرسال تعليق