خطورة تأمين المقاول على المهندس بدون عمل . كتبه مهندس حازم شعبان
# 1 - تأمين المقاول على المهندس
موضوع تامين المقاول على المهندس ده خطير و يا ريت #المهندسين_حديثي_التخرج يركزوا في كل كلمة عشان مايتضحكش عليهم.. لأن مؤخراً أسئلة كتييييير جداً بخصوص الموضوع ده تحديداً...!!!
ممكن تتعرض لموقف إن #مقاول يطلب منك #كارنية_النقابة و #صورة_بطاقتك عشان يأمن عليك (بدون ماتشتغل معاه ) و غالباً هايعرض عليك مقابل مادي و هايقنعك إن ده مجرد إجراء روتيني مافيش منه أي ضرر عليك و هايفصلك من التأمينات وقت ماتطلب..
في الموضوع ده هانفهم مع بعض يعني إيه #تأمينات؟ و ليه المقاول بيبقى عاوز يأمن على #مهندسين؟ و إيه الضرر اللي ممكن يقع عليك بسبب ده؟ و المفروض تتصرف إزاي؟
# 2 - يعنى إيه تأمينات
التأمينات ببساطة هي إن القانون المصري بيلزم أي شركة إنها تأمن على كل الموظفين اللي فيها و ده بيكون من خلال إنها تدفع مبلغ شهري عن كل موظف لوزراة التأمينات و ده علشان لما الموظف يطلع معاش أو لا قدر الله في حالة العجز أو الوفاة.. بيتصرف ليه أو لأسرته معاش شهري، و التأمينات طبعاً حاجة كويسة و هي اللي بتضمن حقوق الموظف في الشركة قدام القانون (ده في حالة إنك تكون شغال في الشركة اللي هايتأمن عليك من خلالها طبعاً)
# 3 - طب ليه المقاول بيبقى عاوز يأمن عليا أصلاً وهايستفيد إيه من كده ؟؟؟
أي مقاول عاوز يشيل شغل من الجهات الحكومية أو الجيش مثلاً.. بيكون شرط أساسي إنه يكون مسجل في حاجة إسمها ( إتحاد مقاولي التشييد ) و اتحاد المقاولين ده بيكون 77 فئات يعني المكاتب الصغيرة بتكون فئة سابعة و لما تكبر شوية تبقى فئة سادسة و تبدأ تترقى تدريجياً لحد ماتوصل للفئة الأولى للشركات العملاقة و من الشروط الأساسية للتسجيل في إتحاد المقاولين هو إن المقاول أو مكتب المقاولات يكون عنده على الأقل مهندس واحد شغال معاه في نفس التخصص اللي هو هايشتغل فيه. و عشان مكتب المقاولات ده يترقى في الفئة بتاعته لازم يكون عنده عدد أكبر من المهندسين اللي شغالين معاه، ولازم طبعاً يقدم إثبات مايفيد إنه عنده عدد معين من المهندسين.. والإثبات ده ببساطة هو إستمارة التأمينات للمهندسين اللي شغالين معاه.
- المهم بقى إن فيه موضه بايخه طلعت مؤخراً و هي إن المقاولين عشان يوفروا رواتب المهندسين بدل مايروحوا يشغلوا المهندسين اللي مش لاقيين شغل.. بقوا بيكتفوا فقط بإنهم يدوروا على أي مهندس حديث تخرج يضحكوا عليه بكلمتين و ياخدوا منه كارنية النقابة عشان يفتحوا بيه ملف تأميني (بدون ما المهندس ده يشتغل معاهم) و بكده يبقوا هما قدام الجهات الحكومية مأمنين على عدد من المهندسين و مستفين ورقهم و يقدروا بسهولة يشيلوا شغل و يكسبوا فلوس في الوقت اللي حضرتك قاعد فيه من غير شغل! و طبعاً المقاول بيوعد المهندس إن الموضوع من الآخر مش مقلق
# 4 - طب إيه الضرر اللي ممكن يقع عليا في حالة إن المقاول أمن عليا ؟
1- مش هاتعرف تشتغل في أي شركة كبيرة إلا لما تفصل نفسك من التأمينات مع المقاول ده الأول و احتمال كبير مايرضاش يفصلك أو يتهرب و ساعتها هاتدوخ عشان تفصل نفسك و غالباً الشغلانه الجديدة هاتطير منك
2- لازم تعرف كويس جداً إنك بكدة بتخالف القانون و بتساعد المقاول ده إنه ينفذ شغل بدون وجود مهندس يشرف على الشغل و يتابعه.. و هاتشيل ذنب و إثم أي شغل ممكن يتعمل غلط.
3- إنت كدة بدون ماتاخد بالك بتساهم بشكل أساسي في بطالة المهندسين لأن حضرتك لو ماكونتش وافقت إن المقاول ده يأمن عليك كان هايضطر إنه يشغلك أو يشغل مهندس غيرك بشكل رسمي بس للأسف هو بيستغل عدم فهم المهندسين و بيضحك عليهم
4- لازم تعرف إن مهنتة الهندسة دي مهنة حساسة جداً و انت كدة بكل بساطة بتخالف شرف المهنة و بتبيع إسمك لحد ماتعرفوش بتراب الفلوس
5- لا قدر الله في حالة إن حصل مصيبة في شغل المقاول ده ممكن يزور توقيعك على المستخلصات و طلبات الإستلام و الأوراق و يلبسك في الحيط و ساعتها تبقى تشوف محامي شاطر عشان يخرجك من الورطة اللي هاتقع فيها
# 5 - هل ينفع أفصل نفسي من التأمينات في أي وقت لو المقاول مارضيش يفصلني؟
هو المفروض إن المقاول هو اللي يفصلك من التأمينات بس لو مارضيش.. و روحت عشان تفصل نفسك مش هاتعرف، فالحل في الحالة دي إنك بتروح تقدم شكوى في مكتب العمل عشان تفصل نفسك من التأمينات و الموضوع طبعاً بياخد شويه وقت عشان الروتين اللطيف بتاعنا و على ما تعرف تفصل نفسك هاتكون الشغلانه الجديدة طارت منك.
# 6 - طب إزاي أعرف موقفي التأميني الحالي ،وهل أنا متأمن علياولا لأ ؟؟؟
ببساطة فيه رقم مختصر تقدر تتصل بيه و تقولهم رقمك التأميني و هايردوا عليك في نفس اللحظة.. خد بقى يا سيدي الرقم سجلوا على موبايلك دلوقتي 16217.
# 7 - يعني إيه رقمي التأميني ده و اعرفه إزاي ؟؟
كل شخص بيكون ليه رقم تأميني زي الرقم القومي كدة.. و ده عشان تعرفه لازم تروح أي مكتب تأمينات و بتوريلهم البطاقه أو شهادة الميلاد و انت واقف بيدولك الرقم.. و ده طبعاً رقم ثابت مابيتغيرش لكل شخص .
Geocell are commonly used for soil stabilization in areas with poor soil conditions. By providing additional support and confinement to loose or soft soils, geocells prevent shifting or settlement, which is especially important in areas with high traffic or construction loads. The geocell structure helps to distribute loads evenly across the surface, reducing the risk of soil failure.
ردحذف